ಅವಸರವಿಲ್ಲ...

೧
ಇಂದು ಅವಸರವಿಲ್ಲ ನನಗೆ
ಹೋಗಿಬನ್ನಿ, ಶುಭವಾಗಲಿ ನಿಮಗೆ
ಇಂದು ನೀವು; ನಾಳೆ ನಾವು
ಬಂದೆ ಬರುವೆವು ಅಲ್ಲಿಗೆ.
೨
ನೀವೆ ಹಚ್ಚಿದ ಹಣತೆಗೆ
ಜೊತೆಗಿರಬೇಕು ಇನ್ನಷ್ಟು ದಿನ
ನಿಮ್ಮದೇ ಕನಸು ನನಸಾಗುವತನಕ
ನೀವಿತ್ತ ದೀಕ್ಷೆ; ನಿಮಗಿತ್ತ ಮಾತು
ನೀವು ತೋರಿಸಿದ ದಾರಿ
ನಾ ತೊಟ್ಟ ಗುರಿ
ತಲುಪಿದ ಮೇಲೆ
ನಾನಿಲ್ಲಿ ಇರುವೆನೇನು?
೩
ಎನ್ನ ಜೊತೆಗೆ ನೀವೆ ಈಗಲೂ
ಎಂದಿನಂತೆ ಬೆಂಗಾವಲೂ!
ಅಂದು ಮೈನೇವರಿಸುತ್ತಿದ್ದರಿ
ಇಂದು ಮನ ತಡವುತ್ತಿರುವಿರಿ
ಅಂತ್ಯವೆಂಬುದೇ ಇಲ್ಲ; ಗುರುವೇ
ನಾನಿನ್ನ ಬೇಡುವುದಿಲ್ಲ.
೪
ಸಾಕೆಂಬುದಿಲ್ಲ
ಹಾಗೆಂದು ಬೇಕಂಬುದೂ ಇಲ್ಲ
ಸಾಕು ಬೇಕುಗಳ ಪಟ್ಟಿಗೆ
ಲೆಕ್ಕ ಇಟ್ಟವರಿಲ್ಲ.
ಇಂದು ನಾಳೆಗೂ ಇರಲಿ
ಭ್ರಮೆ ಹರಿಯುವತನಕ
ನಾನಿಲ್ಲಿ. ನೀವಲ್ಲಿ
ನನಗೆ ಅವಸರವಿಲ್ಲ
ಗೊತ್ತೆನೆಗೆ,
ಬೇಸರವೂ ಇಲ್ಲ ನಿಮಗೆ.